Angh Acharya-i Kollam mi lendong atema tenla agütsür

Dimapur, April 12 (TYO) : Kerala nung Kollam anasa Puttingal Devi Temple complex nung kitsükkirong lendong tulu atalokba atema kanga aoksar aser temulung shiranger, ta Nagaland Angh PB Acharya-i sangdong ka nung metetdaktsü.
Iba lendong nung nisung 106 taküm sama aser 400 shi yirua lir. Iba lendong asür kibongtem asüku lemsateper aser yirua alirtem tekaratiba nung taneptsü angutsü atema sarasademtsür, ta Nagaland Angh, Acharya-i metetdaktsü.
Iba lendong nung yariteptsü asoshi Angh Acharya-i pa indang itasen nungi sen 50,000 Kerala Chief Minister’s Relief Fund nem tenla agütsüogo.
Angh-isa Nagaland nung alirtem dang aser talisa Northeast nunger dang iba tejashi mapang Kerala Chief Minister’s Relief Fund nem tenla agütsütsü atema mepishia metetdaktsü.
Nagaland nung alirtemi Angh ajanga Kerala Chief Minister’s Relief Fund nem tenla agütsütsü akok, ta sangdong nungsa metetdaktsü.