Angh, Acharya-i Prasad Regmi asüba atema mangyimer

Kohima, June 07 (TYO): Than Prasad Regmi anojungi June 06, 2017 nü alima nungi pilaba atema Nagaland Angh, PB Acharya, pa kinüngtsü, Kavita Acharya aser Raj Bhavan, Kohima ketdangsertem aser staff temi mangyimer, ta Raj Bhavan sangdong ka nung metetdaktsü.
Asür Prasad Regmi ya 2010 küm September 16 nü nungi tenzüka Raj Bhavan nung inyaka aruogo, aser pai kanga nendaka tenzükogo, ta sangdong nung shia lir.
“Pa dak teyarinü yimya keta liasü aser pai külem tenzükertem den amalitepa meranga inyaka aruogo. Pai temaba ketdangsertem kanga akhümtsübu. Pa anojungi asüba ajanga Raj Bhavan-i jashia mangyimer, aser pa den metettepa alir ajak atema iba ya tesasatsüka lir,” ta sangdong nungsa shia lir.
Iba ama tejashi mapang ka nung Raj Bhavan, Kohima-i mangyimer kibong den külemi mangyimer aser ajak takoksang Tsüngremi iba ama tako mapang nung mangyimer kibong nem tashi aser tesünep agüjang ta sasrasademtsür, ta sangdong nungsa shia lir.
Raj Bhavan, Kohima nung pa den asüpila sentong tatsüka agia liasü, aser iba sentong nung par medemertem aser Raj Bhavan ketdangsertem den staff tem aden.
Regmi-i pa kinüngtsü den tanur ana toktsür alima nungi pila. Pa den tatembangbuba asüpila sentong atema pa tasümang Bragatinagar, Nepal-i bener ogo.