TGOUN Chancellor, T N Manen-i kaket ka sayatsü

Dimapur, June 19 (TYO): Hombarnü TGOUN Chancellor, T N Manen, IAS (Retd)-i “Microbial resources of Indo- Myanmar (Burma) hot spot region” ta ser kaket ka sayatsüogo.
Iba kaket ya Controller of Exams, The Global Open University Nagaland (TGOUN), Professor N. Irabanta Singh-i bendena züluba lir aser TGOUN indang conference hall nung saya.
Iba kaket ya asenok aliba tesem dak tongti süa ajemdaker züluba lir aser iba kaket nung asenoki tenük agi anguba ‘resources’ dang masü saka tenük agi manguba ‘resources’ indang temetettsütem keta lir, ta TN Manen-i kaket sayatsüdang ashi.
Maneni kaketzüluri lanuputu ajangzüktsü atema iba mesükba kakettem zülutsü imlar, ta paisa ashi.
Prof. Singh-ia o jembidang ashiba agi, Indo-Myanmar tesem nung nisung tapu balala aika alir aser asenoki mangba ajanga asen arem-min aser ali rongsentem samar.
Indo-Myanmar hot spot nung ‘microbial resources’ indang mapatem atema pai kaket ka adoktsü atema North East India nungi life science scientists, agricultural scientist amala dang nungi research papers meshi, ta paisa metetdaktsü.
Sentong nung tetushi süa jaoker Registrar cum Director, TGOUN, Dr. Imotemsu Ao aser Vice Chancellor, TGOUN Dr. H N Dutta natia o jembi.