Angh Acharya-i T.R Zeliang nem tenüngsang agütsür

Dimapur, April 30 (TYO): April 23, 2016 nü Bali, Indonesia nung 6buba Global Leadership Awards 2016 nung Nagaland Chief Minister, T.R. Zeliang-i ‘Lifetime Achievement in Transformation’ anguba atema tenüngsang agütsür, ta Nagaland & Assam Angh, P.B. Acharya-i sangdong ka ashi.
Alima tesem balala nungi takotet nisungtemi tentetba luden ka ajanga T.R. Zeliang shimba ajanga Nagaland nung alir nem konang bener arutsüogo. Iba sempet ajanga Nagaland nüma atanger, ta Acharya-i sangdong ka nung metetdaktsü.
India-i Act East Policy inyakba mapa nung North East India aser talisa Nagaland-i shilem tulu agitsü akok aser asenoki maongkatem magii metoktsütsüla. India kübok North-east State temji South East Asia linüktem den anameta aliba dang masü saka sobaliba, chiyungtsü aser tereprangtsütem nung kanga mesüktepa lir, ta Angh-isa metetdaktsü.
Alimai tanü T.R. Zeliang dak lenisüba tashi aser sempettem ajitetogo, anungji tang asenoki Act East Policy alizüngtem tongteta inyakba mapa nung tongti shilem agitettsü, ta Acharya-isa shisem.
Angh Acharya-isa tanga sangdong ka nung May Day salem lemsatepogo.
“Mapa inyakertemji wadang ajak nung rongsen adokdaktsürtem lir. Mapa inyakbaji tekülem lir. Mapa inyaker dak tashiyim mamshitsüla aser asenoki parnok akhümtsübutsü tim.” ta Angh-i International Workers’ Day indang sangdong nung shia lir.