Angh Acharya-i ‘World Day Against Child Labour’ osang metetdaktsür

Dimapur, June 11 (TYO): Nagaland aser Arunachal Pradesh Angh, PB Acharya-i nübortem dang ozüng alema tanurtem mapa inyakdaktsüba inyakyim anema nokdaktsü tayongzükba agütsü.
2002 küm International Labour Organization (ILO)-i World Day Against Child Labour amungtsü tenzük. Alima nung tanurtem mapa inyakdaktsüba azüoktsü aser iba inyakyim anendaktsütsü atema mapa inyaktsü alizüng yur iba anogo amunger, ta Acharya-i sangdong ka nung ashi.
June 12 nü World Day Against Child Labour amungdang, sorkartem, employers aser workers organizations, civil society aser alima tesem balala nung nisung million aika longjemdaktsür. Iba anogo nung asenoki tanurtem khuret atema tebilemtsü tali metetdaktsür aser tanurtem mapa inyakdaktsüba inyakyim anendaktsütsü atema sentongtem atonger, ta Angh-isa metetdaktsü.
ILO-i Child Labour teratet agütsüba nung tanurtem sen yong ayokba, sentsüh melena mapa inyakdaktsüba, linük nung tanur nem mapa inyakdaktsütsü melaba aser arishi küm 18 teküpok alirtem mapa inyakdaktsüba onüktem shia lir. Iba nung tanurtem rara nung amshiba, teküp yokdaktsüba aser mozü shibelenba ama ozüng alema mapa inyakdaktsübatem dena lir.
Tanurtemji tarutsü atema teimla lir. Anungji asenoki asen loktiliba nung children labour melidaktsü. Tanur shia nem school-i aotsü aser azüngtsü-zülutsü metettsü atema maongka agütsütsüla, ta Angh Acharya-isa ayongzük.