Angh Acharya Namaste & LLDC Folk Festival 2019 nung aden

Dimapur, Aenjeti/January 21 (TYO): Nagaland Angh PB Acharya-i, Ajarakhpur, Bhuj-Kutch, Gujarat nung Aenjeti/January 19, 2019 nü Namaste & LLDC Folk Festival 2019 lapokba sentong nung tongti tesemdanger ama o jembiba mapang, alima linük balala den medemdangra India nung kin balala timba meyoktepa lir aser India sobaliba tsütsü kanga takar lir, ta ashi.
Paisa, sobaliba angazüktepba sentong ajanga linük nung tesem balala nungi pei sobaliba temeja bener nüburtem senteptsü asoshi kishi sadema lapoktsür aser iba ajanga India nunger sobaliba tali tebor tajungba kümdaktsüba den linük tali tashi itdaktsür, ta ashi.
Angh Acharya-i ashiba agi, sobaliba, libaliro, tesem, tamangba yimsü balala süaka item tetsükdaktsütem agina telungjem aser tangatettep ajungkettsü asoshi asenoki iba amala sentong koda tongtibang aji angatettsüla aser iba amala sentongtem ajungkettsü asoshi meranga inyaktsüla.
Maneni paisa, sentepa aliba lokti dang asenok sobaliba aser tangatetba tem renloktettsüsa jenjang tapet agitsü aser asen sobaliba ken, craft aser art asendenshir benshiba den wazüka ayutsü ayongzük.
Anogo pongu tashi amungtsü aliba Namaste & LLDC Folk Festival 2019 sentong nung Kutchi artisan tem aser sobaliba ken aser tsüngsang balala linük nung North East India densema state balala nungi arua shilem agiba angutsü. NEZCC puri iba sentong nung shilem agitsü asoshi Dimapur nungi Sumi Cultural team nem senotsü teyari agütsüogo, ta Governor, PRO sangdong ka ajanga metetdaktsü.