Angh agintsü asoshi PRISM puri signature campaign tenzük

Aizawl, Aami (June) 5 (Agencies): Tentonü Prism puri tawa shimba Mizoram Angh Kummanam Rajasekharan agintsü asoshi signature campaign ka amenokogo.
Iba signature campaign tenzükba sentong ya Aizawl nung Vanapa Hall anasa agi. Prism ya tawa amendakba political party tasen ka lir aser parnoki Angh tasenba Rajasekharan-i Kerala nung secularism inyakyim dak alia Khristantem anema inyakba atema aitsü.
“Mizoram Angh tasenba ya taoba mapang nung Hindu nunger atema nokdakogo aser Kerala nung Khristantem tali mejungi kümdaktsü. Pai secularism inyakyim nung aibelena India temzüng anema inyakogo,” ta Prism party tir Vanlalruata-i sangdong ka ajanga metetdaktsü.
“Iba dak alia party puri politician ka nem Mizoram Angh mapa bendaktsüba magizüktsü. Rajasekharan Angh ama shimba mapang nung pai Kerala BJP tir menden bener liasü,” ta Vanlalruata-isa ashi.
Prisem puri osangbenertem den sensaksemba mapang nung ashiba agi, Kummanam Rajasekharan Angh ama shimba ya BJP pur indang political tsütsü tasa ka lir, kechiyong Mizoram nung state election atongtsüba ana nung dang lir.
“Iba ya yimden yimsüsüba tsütsü BJP pur tasa ka lir. BJP lenirtemi state nung yimden yimsüsüba tsütsü parnok ajangzüktsü asoshi meranger,” ta Prism party puri ashi.
Angh agintsü asoshi signature campaign amenokba sentong nung nisung 10,000 dak temai sign süogo, ta Prism sangdong ka ajanga metetdaktsü. Parnokisa ashiba agi, party puri Mizoram kübok tesem balala nung nüburtem nem tangazükba balala agütsütsü asoshi sentong ayongzüka akatsü.