Angh aser Chief Minister nati Chega Gadi/Langsimnyi benjung salem abener

Dimapur, October 30 (TYO) : Angh P.B Acharya-i sangdong ka ajanga Zeliang nunger den Chega Gadi/Langsimnyi benjung salem metetdaktsü.
Iba benjung ya Tsüngrem dang nungi aluruba nung temoatsü meshiba, temang anema alitsü aser tesentaktep akangshitsü atema amunger. Zeliang nunger atema iba benjung ya kanga tongtipang lir, ta Angh-isa metetdaktsü.
Iba benjung amungdang, asenoki Tsüngrem nem tenüngsang agütsüdi aser aluruba nung temoatsü angutsü atema sarasademba dang masü saka kati ka akhümtsübuteptsü merangdi. Asenoki asen aluyimertem asoshi sarasademtsüdi aser parnok atema tenzüka aliba scheme tem, parnok tonga oa teyari agngutsü atema mapa inyakdi, ta Angh-isa ayongzük.
Asenoki parnok dang Kisan Credit Card, Kisan Soil Card, etc. of Central Government Welfare Projects and Jhan Dhan Yojna, amala agizüktsü atema ajungmesodi, ta paisa shisem.
Iba benjung ajanga Naga nunger ajak dangi yimjung aser telongjem bener arujang ta moatsür aser iba ya ajanga temeim, taitoktepba aser aria bilemtsütepba adokdajang ta sarasademer, ta Angh-isa sangdong nung metetdaktsü.
Nagaland Chief Minister, T.R Zeliang-ia sangdong ka ajanga Zeliang nunger den Chega Gadi aser Lamsimngyi benjung salem lemsatepba metetdaktsü.
“Asenoki asen takar sobaliba aser yartsüngsangtem wazüka ayutsü atema ayongzüker. Zeliang nunger ajaki Chega Gadi aser Lamsimngyi tepela nung aser tetezü keta amungtsü moatsür,” ta Media cell, Chief Minister’s Office sangdong ka nung metetdaktsü.