Angh aser CM-i Holi salem abener

Kohima, March 12 (TYO): Holi benjungmung mapang Nagaland Angh, P.B. Acharya-i Naga nunger den Holi benjung salem lemsateper, ta tanü Raj Bhavan sengdong ka ajanga metetdaktsü.
Angh Acharya-i, “Holi benjung ya tepen abongba mongpu atongba tsüngküm ka lir aser Holi indang sentsü balala aika ajanga linük nung sobaliba aser senmang balala temaitsü sayur,” ta ashi.
Paisa nüburtem dang, iba benjungmung ajangasa linük nung secular inyakyim tali tashi itdaktsüba den külemi nüburtem nem telongjem, adianu temeimtep aser tepela bener arujangma, ta ashi.
Acharya-isa, sobaliba tepela Holi benjungmung ajanga akhidang nungi lokti nung aliba temeim, akhümtsübutep aser tangatetba tashi itshidaktsütsü aser yimjung nung tejakleni otetttsüa nübur ajak longjema alitsü imlar, ta ashi.
Ano külen tanü Chief Minister’s Office Nagaland, Media Cell sangdong ka ajanga, Nagaland Chief Minister, Shrühozelie Liezietsu-i state aser linük nung Hindu nunger ajak den sentsü balala benjungmung, Holi salem lemsateper, ta metetdaktsü.
Chief Minister-i, “Hindu nunger sobaliba benjungtem tongti rongnung Holi ya densema lir, saka tepela aser telongjem aliba ajanga sobaliba aser tamangba yimsü dak alia iba benjung taliba shisangdaktsür,” ta ashi.
Chief Minister-isa, iba benjungmung ya ajanga ajak nem yimjung, tepela aser azükaru bener arutsütsü imlar, ta metetdaktsü, ta sangdong nungsa shia lir.