Angh aser NPCC Tir nati asüku lemsateper

Dimapur, September 03 (TYO) : Nagaland Angh, P.B. Acharya-i, “Nenoki temulung ajak agi meima alila netsü, IFS(Rtd.) aser Naga Diplomat mezüngbula, asür Neichülieü Nikki Haralu asüba osang angashia temulung mepelateter,” ta Raj Bhavan, Kohima nungi sangdong ka ajanga lar kinungertem den lemsatep.
La diplomat ama inyakdang Ministry of External Affairs nung akok tashi yaritepa linük aika nung inyakogo. La anisüngzüker külen Nagaland State Social Welfare Advisory Board nung medenbula inyak. Asür Neichülieü Nikki Haralu ji tajungmesor aser tangari temulung lema ranglokba nisung ka liasü. Naga tsürji shinga küboka masü ta lai sayutetogo. Ni asür kinungertem den asüku lemsateper aser iba ama mangyim tia nung aliba mapang ajak madak Tulusang Tsüngremi nenok sünepjang ta sarasademtsür, ta kasa sangdong nung ashia lir.
Ano NPCC Tir, K. Therie-ia mezüng Naga Ambassador, asür Neichülieü Nikki Haralu asüba osang angashia temulung shiranger, ta sangdong ka ajanga lemsatep.
La ya Nagaland jala rongnung teshimtet jala ka liasü aser la ajanga Naga nungera tangari meteta aküm. Linük nung tetsürtemi meshitetba timtem ajuruba mapang lai mapa tulu inyakteta liasü aser ibaji tamamatsü otsü lir. Iba den külemi lai Naga nunger aser Nagaland atema mapa tajung jenti inyaktsüogo. Putu ajak nung la mapatem ajanga nüburtem tali ajungmesotsü, ta sangdong nungsa shia lir.
K. Therie-i, “Kü den külemi NPCC nung züngsem ajaki asür kinungertem den asüku lemsateper. Ner kibong nem Tsüngrem tulusangi tesüneptsüba agüjangma, ta kasa sangdong ajanga ashi.