Angh & CM nati Ngada benjung salem metetdaktsür

Dimapur, November 27 (TYO) : Nagaland Angh-i Nagaland nung aliba Rengma nunger den Ngada Festival 2016 salem metetdaktsü.
Rengma nungeri Ngada benjung ya tsünüsenbongba mongpu tembangba takzüa amunger. Asenok nem temoatsü agütsüba atema iba benjung amungdang asenoki Tulusang Tsüngremi nem tenüngsang agütsüdi, ta PRO Raj Bhavan-i sangdong ka nung metetdaktsü.
Ngada benjung ajanga telongjem, putepshiba, taitoktepba, yimjung aser nübortem tsüngda putepa alitsü tensa bener arujang ta moatsür, ta Anghisa ashi.
Tanü asenoki aluyimertem dang kanga pelaba metetdaktsür. India ya tsünüsenbongba linük ka lir, anungji asenoki aluyimertem yaria, parnok nem Central & State welfare project/schemes tenzükja aliba maongkatem agitsü atema ajungmesodi, ta paisa shisem.
Ngada benjungmung ajanga Rengma nunger dang masü saka Naga nunger loktiliba nung temoatsü bener arujang ta moatsür, ta PRO Raj Bhavan-i sangdong nungsa metetdaktsü.
Nagaland Chief Minister, T.R Zeliang-ia sangdong ka nung Rengma nunger den Ngada benjung salem lemsatep.
Ngada ya Rengma nunger atema tongtipang benjung ka lir aser iba benjung ta tanur-tain ajaki kanga longsolongbena amunger. Iba benjung amungba ajanga nübortem tsüngda telongjem mesamatsü aser tetezü keta amungtsü imlar, ta Media Cell, Chief Minister’s Office, Nagaland sangdong nung metetdaktsü.