Angh, Home Minister & DCCI nungertemi Ashish khasetba aitsür

Dimapur, August 4 (TYO) : August 2, 2015 nü Signal Bazar, Dimapur nung shishilembar Ashish tepsetba atema temulung shiranger ta Nagaland Angh, P.B.Acharya-i ashiba osang Commissioner & Secretary to the Governor-i sangdong ka nung metetdaktsü.
Nisung ajaki state nung yimjung bener arutsü atema inyakba mapang ka nung yamai ozüng anema mapa inyakba ajanga tajung bener marutsütsü ta Angh-isa ashi.
Nagaland Angh-i iba mapa kukua aitsür aser tasür kibong den asüku lemsateper ta Commissioner & Secretary to the Governor-i sangdong nungsa shia lir.
Nagaland Home Minister, Y Patton-i sangdong ka nung shishilembar Ashish Saha khasetba kukua aitsüba metetdaktsüogo.
Dimapur yimti nung ozüng anema inyakertem azüoktsü atema sorkari tanen makai mapa inyaka arur. Nagaland nung mezüngbuba atema Dimapur nung Police Commissioner jenjang ajungketba sülen asenoki ozüng anema mapa inyaksangshiba ajema akümba nguogo. Shishilembadak tiyongtsü Dimapur nung alirtem sünepa aser timtem melii lidaktsütsü atema state sorkari Police Commissionerate maparen tenzüktsü, ta Y Patton-isa sangdong nung shia lir.
Ozüng anema inyakertem aputsü atema state police nem tetuyuba agütsüogo aser Dimapur nung dang masü saka state ajungalen yimjung tensa meraksadaktsütsü atema state sorkari tenangzükba agia lir aser iba nung ajemdaker inyaktsü, ta Home Minister-isa ashi.
Ozüng anema inyaksangshiba ajanga kodanga yimjung aser telemtetba tajung mangutsü ta sorkari nenshia metetdaktsür, ta Y Patton-isa shisem.
Ano, Dimapur Chamber of Commerce & Industry (DCCI)-ia shishilembar Ashish K. Saha khasetba kukua aitsür aser tasür kibong den asüku lemsateper, ta sangdong ka nung metetdaktsü.
Ozüng anema inyakertemi Tsüngremi agütsüba meimchir taküm mapayui mapang shia shishilembartem dak tashiyim mapa inyaker. Dimapur nung mapang shia shishilembartem tepsetba ajanga ozüng amertemi pei senso kümzüka meyutetba jungkai adoka sayur, ta DCCI-isa metetdaktsü
Dimapur nung Police Commissionerate system tenzükba ajanga ozüng anema inyaksangshiba azüoktettsü ta nübortem teimla liasü. Anungji iba mapa inyakertem pua tapet temerenshi magütsütetra Police Commissionerate system tashi maitba tali jungkai adoka sayutsü, ta DCCI tir Hokivi Chishi-i sangdong nung shia lir.
Dimapur nung shishilembartem anema mapa inyakba manenra shishilembadak ajak shibangtsüsa akümtsü, ta DCCI tirisa metetdaktsü.