Angh-i anir Eid Ul Fitr salem metetdaktsür

Dimapur, June 25 (TYO): Nagaland aser Arunchal Pradesh Angh, PB Acharya-i sangdong ka nung Eid Ul Fitr benjungmung salem lemsatepogo.
Iba benjung ajanga loktiliba nung aria bilemtepba aser putepa aliba tensa arudaktsütsü imlar, ta pai ashi.
Idu’l Fitr ajanga Ramzan temeshi ita tembangba sayur. Iba ita ya sarasadem, temoatsü aser taitoktepba mapang lir. Ramzan ajanga loktiliba nung teinyaktsü aser tebilemtsütem metetdaktsür. Iba benjung ajanga Nagaland aser linük nung yimjung aser terenlok adoktsü imlar, ta Angh Acharya-isa metetdaktsü.
Iba Eid nung Allah-i tepela aser takokba lenmang nung asenok ajak aniang ta moatsür ta paisa shisem.
Nagaland nung aliba Muslim nunger ajak den Idd-ul-Fitr tepela salem lemsateper ta Dimapur District Citizen Forum (DDCF)-i sangdong ka nung metetdaktsü.
Muslim nungertemi Ramadan ta ajaba ita ka lumia sarasademba atema pelar aser iba sülen amungba Idd-ul-Fitr benjung tepela salem abener, ta DDCF Joseph N. Lemtur-i ashi.
Iba benjung ajanga Dimapur nung yimjung aser azükaru bener arutsütsü imlar, ta paisa sangdong nung shia lir.
Ano, Muslim Council Dimapur (MCD)-ia sangdong ka nung Nagaland nung alir ajak dangi Idd salem abener ta metetdaktsüogo.
Ramadan ta ser ita ka sarasademba aser lumiba sülen iba benjung ya Muslim nungertemi alima ajungalen amunger, ta MCD Working President, A. Rahman-i sangdong nung shia lir
Iba benjung ajanga Nagaland nung aliba kin aser telok ajak tsüngda yimjung, telongjem aser adianu tangatetba adokdaktsütsü imlar, ta paisa shisem.
Dimapur nung IDD Namaz ji asüngnep 8:00 ako nung local IDDGAH Prayer Ground nung alitsü, ta MCD sangdong nungsa metetdaktsü.