Angh-i Armed Forces Flag Day week tenzüktsü

Dimapur, December 2 (TYO) : December 2, 2015 nü Nagaland & Assam Angh, PB Acharya-i Raj Bhavan nung Armed Forces Flag Day week tenzüktsü.

Veteran aser tasütait sepaitemi linük kümzüktsü atema bendanga agüja raraba aser ano civil ketdangsertemi teyari meshidang law & order mapa takok ngua inyakba asoshi tenüngsang agüja kümshia Armed Forces Flag Day amunger.

Ano, Flag Day ya public teyari angutsü atema amunger. Rara nung takoksa angurtem, tang teinyakdak sepaitem aser kibong taküm libaliro aser ex-servicemen den kibongtem pusema nungittsü atema iba anogo ayongzüka amunger.

Tanü Angh-i ex-servicemen aser parnok kibongtem den ajurutepa sensaksemdang, parnoki linük asoshi bendanga agüja inyakba mapa kodanga mamatsü, ta ashi.

Acharya-isa parnok dang cooperative societies tentettsü aser district balala nung handloom & handicrafts production units lapoktsü tayongzükba agütsü.

“Nenoki yanglutetba osettem ni alizüktsü aser ano yokdoktsü atema shishilembartem den tesentaktep yanglutsütsü” ta Angh-isa nangzük.

PB Acharya-isa ex-servicemen dang pei pei aliba tesem nung sorkar school tem “Guardians & Guest Teachers” ama adopt asütsü aser school tem tashi itdaktsütsü ayongzük.

Iba sentong nung Brig KK Roy Choudhury, SM, VSM (Retd), Secretary Rajya Sanik Board-i Armed Forces Flag Day indang osang metetdaktsü.

Sentong nungsa Angh aser pa kinungtsü Kavita Acharya nati welfare fund agütsü.