Angh-i BJP pusemer ta Gogoi-i jembiba o Kejriwal-i nungiter

New Delhi, Nov. 29 (Agencies): Assam Chief Minister, Tarun Gogoi-i Tir, Pranab Mukherjee dang state Angh, PB Acharya tekaraba nung agientsü akhangba pusema Delhi chief minister, Arvind Kejriwal-ia jembiogo.
Gogoi-i, Angh-i pa indang office ji BJP office kongsang ka kümdaktsüogo ta ashiba pusema Kejriwal-i twitter ajanga, “Anghtemi BJP pusema Temzüng alema inyakba CM aikati benoker. Iba ya coop federalism asü (?)” ta asüngdang.
Kejriwal-i aniba Delhi sorkar ya onük aika nung Delhi LG, Najeeb Jung den obang meputepi tekong kanga merangtepa arudar.
Yashi Tir Pranab dangi züluba shidi nung Gogoi-i, Acharya nem maneni Assam Angh in-charge agütsüba ajanga democracy inyakyim nung timtem kanga ajurutsü aser state secular nung tapok aika adoktsü, ta shia lir.
“Onoki Padmanabha Balakrishna Acharya ozü state nung pelashishia agizük, kechiyong linük Temzüng menden temaba ka nung amener ka ama pai tim nung kanga kümdanga aser sangra-a inyaktsü ta onoki bilem,” ta Gogoi-i Tir dangi züluba shidi nungji shia lir.

“Ajisüaka, office agizükba mapang nungi Assam Angh-i pa mapatem ajanga Angh akhümket ajemdaktsüogo ta ni nemjema ashir,” ta Gogoi-isa shia lir.
Assam CM-i, Acharya-i “State Angh ka ama Temzüng kübok pa mapa o pa yimtenren aser tangatetba mebendangteter, aser ibaji ajanga Centre nung yimsüsüba party, BJP aser Rashtriya Swayamsevak Sangh den kanga sentaktepa aliba kuli lir,” ta aija lir.