Angh-i Delhi Nagaland Police ketdangsertem den sensak asem

Angh-i Delhi Nagaland Police ketdangsertem den sensak asem

February 10, 2016 nü New Delhi, Nagaland House nung Nagaland Angh, P.B. Acharya aser Delhi nung aliba Nagaland Police Officer tem külemi tangokba noksa ka angur. 

Kohima, February 11 (TYO): New Delhi Nagaland House nung February 10, 2016 nü, Nagaland Angh, P.B. Acharya-i Delhi nung aliba Nagaland Police ketdangsertem den senden ka mena liasü.
Iba senden nung Commandant Neiba Newmai-i Angh den Delhi nung parnok teinyaktsütem lemsatep. Iba mapang pai Delhi nung Nagaland police ajak agi 1266 lir, ta ashi.
Police temi pei lemzükba mapa kanga takok ngua inyakdar aser Delhi nung kanga jangratema alir, ta Nagaland police ajak tenüng nung ashiba mapang pai, State Angh-i mapang agütsüteta parnok den ajurutepba asoshi pelaba metetdaktsü.
Angh P.B. Acharya-i Police ketdangsertem aser züngsem ajaki linük yimtiba nung pei lemzükba mapa takok ngua inyakba asoshi tenüngsang agütsü.
Angh-i, nisung ka takümji sobutsü balaka sobur pei lemzükba mapa inyakbaji dang masü saka asen inyaksangshi, yimyaliro aser jembishinü ajak agi state ka indang ambassador ta asübaji sayutettsüla kechiba süra India tesem tiyonglen alirtemi Nagaland mesüra northeast tesem aiben mesemdangtetter, ta ajungshidang, paisa, northeast nungibo kaketshisatsü, mapa aser business balala atema India nung aliba yimti balala nung arua alir, ta shisem.
P.B. Acharya-i, “Asenoki teinyaktsü mapatem külemi benloker asen State aser Northeast nüburtem indang sobaliba aser yimyayimpong balala yangi aliba nüburtem den lemsateptsüla,” ta ashi.
Nagaland House ya Naga nunger atema tensa ajak nung nungdakba ki ka lir aser Nagaland House nung inyakertem, police, shishilembartem aser Naga nunger kaketshisatsü bushirtem ajaki Naga nunger rangben tenüng nung Delhi nung atalokba tajung tamajung ajak lemsateper, ta paisa ashi.

You must be logged in to post a comment Login