Angh-i Employment, Skill Dev. ketdangsertem den senden amen

January 22, 2018: Tentonü (Hombarnü) Raj Bhavan, Kohima nung Nagaland Angh, PB Acharya-i Commissioner & Secretary, Anenla T Soto  aser Employment, Skill Development & Entrepreneurship Department nungi ketdangsertem den senden amenba sülen tangokba noksa nung angur. 

Dimapur, Aenjeti 22 (TYO): State nung mapa inyaktettsü mechi nung Department of Employment, Skill Development & Entrepreneurship dang state nung teka mapa balala shia alirtem nüngdakba bushiteta lanurtem nem nüngdakba tesayuba agütsütsü asoshi Nagaland Angh, PB Acharya-i tetuyuba agütsüogo.
Raj Bhavan, Kohima nung Aenjeti 22, 2018 nü department ketdangsertem den senden amenba mapang Angh-i item teuyuba agutsü.
State nung lanurtem atema süoki ia bilema jembiba mapang, state nung unemployment ya khuret tulutiba lir, ta Angh-i ashi. Pai Department dang state renloktsü aser employment tebilemtsü samatsü atema lanurtem nem training agütsütsü ajungshi.
Kaketshirtem mapa nung ajangzüktsü, pei sasa inyaka tebok sünga alitsü aser temeden wazüka yutettsü asoshi kasa senden nung Angh-i department dang Nagaland nung University aser College tem den osang ola agitepa VI Semester nung skill development course inoksemtsü asoshia benoka jembi.
Iba senden nung Employment, Skill Development & Entrepreneurship department nungi ketdangsertemi Angh dang department ajanga Skill Development maparen achayanga agiba indang rasa-a ashi.
State nung trades 21 indang Industrial Training Institute ti lir, ta department ketdangsertemi Angh nem metetdaktsü.
Lanurtem ajangzükdaktsütsü nükjidong nung Apprenticeship Training programme, Job Mele, Job & Career Fair amala sentong balala department-i ayongzüka agia arur, ta parnokisa Angh nem metetdaktsü.
2016-17 ya Nagaland sorkar ajanga “Year of Construction Workers” ta sangdongba nung ajemdaker state nung tang aliba kisü-jensür 550 nem tesayuba balala agütsüogo, ta ketdangsertemi shisem.
Iba senden nung department nungi Commissioner & Secretary, Anenla T Soto aser Addl. Director & HOD, Y Vandanshan Lotha nati anir ketdangsertem oa aden.