Angh-i ESM tem dang yimjung mapa nung shilem agitsü ajungshi

Kohima, October 8 (TYO): Nagaland Angh, P B Acharya-i Brihostibar nü Ex-Servicemen (ESM) tem dang state nung teti asoshi yimjung bener arutsü atema sorkar den yariteptsü ajungshiogo.
“State nung teti asoshi yimjung bener arutsü kanga nüngdaka lir aser ibaji atema tang aliba state sorkari kanga meranga inyakdar, anungji iba mapa nung takok angutsü asoshi Ex-Serviceman ka ama mapa nungi anisüngzüker alirtemia sorkar den yariteptsüla,” ta Kohima nungi kilometre 18 shi pilar aliba Military Station, Jakhama nung Nagaland nung district tenet atema Ex-Servicemen (ESM) Rally akaba mapang Angh-i ashi.
Ex-Servicemen temi parnok animesüngzükdang linük asoshi bendanga agüja inyakba tushia ashidang pai, security nungi anisüngzüker alir ka ama ESM temi lanurtem nem yimjung mapa nung tetuyuba agütsütsüla, ta shisem.
Paisa, ESM temi sorkar nungi teyari aruba dang matai linük tashi aittsü aser ajungtsü asoshi shisa tuyuba nung yariteptsüla, ta ashi.
GOC of 3 Corps, Lt Gen Bipin Rawat-i servicemen aser parnok kibongtem yaritsü atema army aser state sorkar sentong tem lemsatepa liasü.
Paisa, ajak ajangzüktsü asoshi Centre-i ‘One Rank One Pension’ benshitsü atema telemtetba agiogo, ta ashi.
Naga nungeri army nung kanga tajangzük agütsüba lemsatepdang pai, “Naga nunger tasü aitba aser bendanga agüja inyakba mapatemji otsüsütsü lir aser ibaji ajanga Naga Regiment ka lapoktsüsa maongka ngutetogo,” ta shisem.
Nagaland nung ESM 3500 shi lir aser item rongnung 350 shi iba rally nung dena lir, ta paisa ashi.
Iba rally ya Dimapur, Kohima, Wokha, Peren, Zunheboto, Phek aser Kiphire district tem nung aliba Ex-Servicemen tem atema Rajya Sainik Board Nagaland den angatettepa Red Shield Division-i ayonga amungba lir.
Army temi ano Mokokchung, Mon, Tuensang aser Longleng district tem atema Jorhat nung rally ayonga amungtsü sentong lir, ta GOC-i ashi.
GOC Red Shield Divison Maj Gen P N Rao aser Secretary Rajya Sainik Board Nagaland, Brig (Retd) K K Roy Choudhary natia rally nung o jembia liasü aser iba mapang state sorkari Ex-Servicemen tem jenjang tajungba kümtsütsü merangba metetdakja liasü.
Iba sentong nung linük asoshi taküm bendanga agütsür sepai kinüngtsü (Veer Naris) asem den World War-II nung shilem agir parnok pongu nem tetushi agüja liasü.
Sentong nung ESM tem jenjang tajungba kümdaktsütsü asoshi Army aser State Sorkar tem mapatong aser sentong tali jangja metetpelatsü asoshi stall aika lapoka liasü.
Rally akaba tesem nung ‘Pensioner Grievance Cell’ ka lapoka liasü aser iba nungi ESM-i tem nem pension dak sentakba nung metetpelatsü maongka agüja liasü.
Iba rally akaba ajanga ‘Suvigya’ tentet ka tenzükogo aser iba ya ajanga state nung ESM tem pension dak sendakba tebilemtsü nung teyari agütsütsü.
Sentong amungba tenüng nung mozü nung mongintemi Medical camp-a ka lapoka liasü.

You must be logged in to post a comment Login