Angh-i Hokivi Chishi asüba mangyimer

Kohima, August 05 (TYO): Nagaland aser Arunachal Pradesh Angh, PB Acharya-i August 4 nü DCCI Tir, Hokivi Chishi asüba osang angashia aoksar aser mangyimer, ta tanü PRO to Governor-i sangdong ka nung metetdaktsü.
Angh-i, “Asür Hokivi ya shishilembartem taküm jenjang ajungkettsü atema inyaker nisung ka liasü. Pa ya lokti tenzüker tajung ka liasü aser pai inyakba mapatemji ajaki teti menungratsü aser bilemtettsü. Pa asüba ya Sumi nunger atema dang masü saka Naga nunger ajak asoshi takoksa lir,” ta metetdaktsü.
Angh-isa, Tsüngremi asür kibong züngsemtem nem tashi tasen agüjang aser tesünep agüjang ta sarasademtsür, ta metetdaktsü.