Angh-i Konyak tsürtem nem tenüngsang agütsü

Kohima, April 18 (TYO): Nagaland Angh, PB Acharya-i sobaliba tsüngsang tulutiba Konyak Dance ajanga World record yanglutetba (Guinness World Record) atema iba tsüngsang nung shilem agir Konyak tsür ajak nem tenüngsang agütsü.
April 5 nü Mon jila nung Aoleang den repsema Mini Hornbill benjung mapang nung Konyak tsür 4687-i sobaliba tsüngsang nungji shilem agia liasü.
President Konyak Women Organization, Lomei Konyak dang Angh-i, Mon district kübok yim 115 nungi Konyak tsür 4687-i minute 5 ser second ana sobaliba sobutsü nung tsüngsanga kentenba sempetji World Record-i reprangtetogo. Iba ya putiotsü asütsüsa takok anguba ka lir, ta metetdaktsü.
Angh-isa tetsürtem dang akhi tetsütebou senmang aser sobaliba atema nüma atangtsüla aser pei maitsü- tetsü oshi wazüka ayutsüla, ta ayongzük.