Angh-i Kuki nunger den benjung salem lemsatep

Kohima, November 02 (TYO): Nagaland Angh, PB Acharya-i Kuki nunger den Kut benjungmong salem osang lemsatepogo, ta tanü PRO to Govenor sangdong ka ajanga metetdaktsü.
“Iba benjungmong ya Kuki nunger atema tepela benjungmong ka lir; kong parnoki küm piyong mapa kanga meranga inyaker chiyungtsü amena rizünger amonger. Tsüngremer masadangtetba temeim aser temoatsü atema ajaki Tsüngrem nem tenüngsang agütsütsüla,” ta Angh-i ayongzük.
Angh, Acharya-i, Kut benjungmong ya tenüngsang agütsüba benjung ka lir, aser iba benjungmong nung kentena aser tsüngsangtepa pelateper. Iba benjungmong nung parnok dak aliba tashi aser sempettem sayatsü atema lanurtem aser yimdaklirtem nem maongka agütsütsüla, ta ashi.
Paisa, iba benjung ajanga telongjem adokdaktsütsüla aser jila den yimtsüng ajak nung tesünep alitsü aser state nung lenla ajaklen terenlok alitsü atema ajak longjemer inyaktsüla, ta ayongzük.
Iba benjungmong ajanga Kuki nunger nem yimjung, tesünep aser azükaru bener arujang ta sarasademtsür, ta Angh-isa shisem.