Angh-i Kungfu Championship lapoktsü

Kohima, November 27 (TYO): Durbar Hall, Raj Bhavan Kohima nung Nagaland Governor, PB Acharya-i November 27, 2017 anogo All India Kungfu Championship lapoktsü. Iba sentong ya Nagaland nung mezüngbuba agir lir.
Iba sendong lapoktsüdang, “Kungfu densema saisapong ajungai yimya shidak amshiba, temulung lema lenir sempet amshiba, kati ka den angatettepa akhümtsüpuba nung yarir aser iba ajanga nisung ka taküm nung jenjang tajungba kümdaktsür. Iba ajanga lokti nung amshir, temang tashi itdaktsür, shisatsü renlokdaktsür, bendanga agütsür, temang tuozük shidak yudaktsür, tejashi aser anibelen tajemba kümdaktsür aser pei-sasa pei dak temulung lema lenir ka kümdaktsür,” ta Angh-i ashi.
Acharya-isa iba asayamung nung shilem agir dang asayar yimya amshia tetoktepba ajunga nung shilem agitsü asoshi ajungshia liasü.
Iba sentong ya ANKFA Co-ordinator, T Amenla Jamir-i ketdang süa ani aser Rev. Dr. Vevo Phesao-i sarasadem. ANKFA AGS, Kutoho-i tepela o jembi aser Raj Bhawan kima All Assam Kungfu students temi Kungfu demonstration sayua liasü.
Government Higher Secondary School Ground, Dimapur nung November 28 nungi November 30, 2017 tashi agitsü aliba All India Kungfu Championship nung state 24 nungi shilem agitsü.