Angh-i Naga kin 16 indang mezüngbuba Naga Glossary sayatsü

Kohima, October 2 (TYO) : Nagaland Angh P B Acharya-i Hokolbarnü ‘Key Words” ta ser mezüngbuba Naga Glossary sayatsüogo.
Iba osep nung Nagaland nung kin 16 indang olung aser orentem enoka lir.
Oshiji pei sobaliba indang maitsü lir aser pei tetsü tasola oshi wazüka ayutsüla. Sobalibaji taküm libaliroba dang masü saka oshi nung tera yanga lir, ta tanü Acharya-i ashi.
Kohima Educational Society (KES)-i kin 16 sangertemi külem oshi ka yanglutsü atema osep tajung adokba atema Angh-i parnok nem tenüngsang agütsü.
Tanü sentong nung KES tir, Charles Chasie-i osep adokba indang osang metetdaktsüdang ashiba agi, iba Glossary nung olung 2900 shi lir aser itemji nisungtemi anogoshi jembibatem lir.
“Item olungtem asenoki angazüktettsü aser itemji amshia asenok tsüngda sensaksem sütettsü. Iba osep adokba indang nükjidong ana lir aser mezüngbubaji Naga nunger kintem tsüngda oshi angazükteptsü aser sensaksemtettsü atema lir” ta Charles Chasie-isa ashi.
Tanabuba nükjidongji oshi bushirtem aser item mesükba mapa inyakertem yaritsü atema lir, saka ajak dang tongtipangbaji asen kin balala indang oshitem kümzüka ayutsü atema lir, ta paisa metetdaktsü.
Naga nunger lanurtem, talisa jila nung alirtemi pei tetsü tasola oshi mejembir aser yamai dang ora künübo parnoki English mesüra Hindi angazükba ama pei tetsü tasola indang oshi angazüktsüsa akümtsü, ta KES tir, Charles-isa ashi.
‘Key Words” osep ya Kohima Educational Trust aser Kohima Educational Society-i adokba lir. Iba telok ya Kohima rara mapang Nagaland nung shisaluyimba maparen inyaktsü atema British mezüngpurtemi tentetba telok lir.
‘Key Words” osep nung Nagaland sorkari ajiteta aliba oshi 16 – Angami, Ao, Chakhesang, Chang, Kachari, Khimaniungan, Konyak, Kuki, Lotha, Phom, Pochury, Rengma, Sangtam, Sema, Yimchuger aser Zeliang oshitem nungi olung aser orentem enoka lir.
Tanü sentong nung mendenji KES Chairman Dr. P. Ngully liasü, Rev. Dr. L. Tsansow-i temoatsü meshia sarasadem aser Counsellor KES Pheluopfelie Kesiezie-i tesentepertem pela agizük.