Angh-i Naga nunger shisashirtem dang Nagaland melenshitsü ayongzüker; Angh aser kinüngtsü nati school tanurtem den külemi chiyung

Khonoma, August 21 (TYO) : India sasep nung Nagaland ya takar aser tashitait state ka akümtsü takoktsü lenmang lir anungji Naga nunger shisashirtemi tarutsü atema meranga inyaktsüla ta Hokolbarnü Nagaland Angh, PB Acharya-i ayongzük.
Angh-i tanü Khonoma semdangdang iba tayongzükba agüja liasü. Pai ashiba agi, “Nagaland tashi itdaktsütsübaji ajak indang khuret lir saka shiamemetertem, talisa lanurtemi lokti nung temelenshi bener arutsü atema inyaktsüla.”
“Nenok tashi itdaktsütsü atema bendangertem arutsü nüngdak madoker. Nenok dak tashi lir. Tsüngremi asenok nem ajak agüja lir anungji asen dak aliba sempettemji tajungtiba nung amshitsüla” ta PB Acharya-isa ashi.
Paisa shisashirtem dang lokti asoshi tetsükdaktsü masü saka tagitsü ka südakjang ta ayongzük.
Nagaland nung shisashirtemi tebilemtsü khuret bena alizüng mayu tashi Nagaland memelenshitsü, ta paisa shisem.
“Tang aliba education system ya melenshitsüla aser university temji shisatsü angudak dang masü saka tekolok aser tebilemba renlokdak asütsüla” ta PB Acharya-i ashi.
Angh-isa pei oshi ajungkettsü atema tayongzükba agütsü aser pai ashiba agi, “English nem tekoktaktsü. Nai jembiba oshiji masü saka nai jembibaji tongtipangba, English kija jembitsü ashiba jagi na shisakar ka ta meshitettsü.”
Tanü Angh-i anir tesemdanger teloki mezüng Semo Khel nung Khonoma fort semdang aser idak nungjagi Lower Primary School aser museum semdang. Terhotsiese nung aliba Village Council hall nung sentong agiba sülen Angh’er teloki Dzüleke nung Tragopan Sanctuary semdang.
Tanü Angh aser pa kinüngtsü Kavita Acharya nati Lower Primary School, Khonoma semdangdang idakji aliba kaketshirtem den külemi mid-day meal chiyungba ajanga tesentepertem süngmangdaktsü.
Khono Thevo khel nung aliba LP School nung Angh-i kaketshirtem den külemi classroom nung mener mid-day meal chiyung aser idangji tanurtem kanga dang süngmangtep.
Angh-i tanurtem fork aser spoon medeni dang chiyungba angu aser iba jagi paia tanurtem den kasa teka agi dang chiyung. Pai tanaben chi meshia chiyung aser idangji tesayur kanga süngmanga pelatep.
Angh Acharya-i osangbener dang ashiba agi pai tan agi tasembenbuba school tanurtem den mid-day meal chiyunger aser mezüng pai Tripura aser Assam nung chiyung.
Iba sülen pai Khonoma nung Village Education Committee züngsemtem den ajurutepa sensaksemdang mid-day meal ji hopta shia Hokolbarnü dang agütsür ta angazük aser iba atema Angh-i VEC züngsemtem aser tesayurtem dang school tanurtem anogoshia chiyungdaktsütsüla ta ashi.
Tanü Angh den külemi Kohima Deputy Commissioner aser Superintendent of Police na den tongti ketdangsertem liasü.