Angh-i Nagaland nungi kaketshirtem den sensak asem

Dimapur, Luroi/August 23 (TYO): Nagaland Angh PB Acharya-i kaketshirtem dang parnok kaket shisatsü bushiba tembangba sülen pei yimtsüng aser jilai meyipa arua lokti ajangzükdaktsütsü asoshi inyaktsü atema ajungshi. Iba olen ya Angh-i Mangalore, NITTE University nung Luroi/August 23 nü Nagaland nungi kaketshirtem den sensaksemba mapang ashi, ta ketdangser sangdong ka ajanga metetdaktsü.
Angh Acharya-i maneni kaketshirtem dang pei tetsü oshi jangraa angazüktsü aser sobaliba sentong balala nung temulung agüja shilem agitsü asoshi ajungshi. Angh-isa, University kübok Chancellor aser Academic tekolak tem den ajurutepa liasü.
Acharya-i achaayanga NITTE University nung course balala atema taoba küm ishika Nagaland nungi kaketshirtem nem kaketshitsü bushitsü asoshi menden agüja arudar. Iba University-i Nagaland nungi aruba kaketshirtem dang tuition aser hostel fees memeshi angadi agi lidaktsür.