Angh-i Nagaland Vision Document 2030 sayatsü

Kohima, December 10 (TYO) : Naga Heritage Village Kisama nung Hornbill Festival tembangba sentong nung Nagaland Angh, P B Acharya-i kanga dang nüngdaka aliba ‘Nagaland Vision 2030 document’ sayatsüogo.
Küm 15 tsüngda Nagaland renlokdaktsütsü aser sentongtem atongtsü atema iba vision document ya len anir ka ama asütsü nükjidong nung yanglu.
“Asen state kechisarena ajaklen renloktsü atema Nagaland Vision Document 2030 ya len anir ka südaktsüdi” ta tanü Angh Acharya-i ashi.
Asen state nung tsünüsenbongtsütem, süngjanglijang aser aonsotsütem yokdoktsü atema shishilembadak tajung nüngdaker. Asen lima nung adokba aou, narotem yagi sen aika ajangzüktettsüsa shishilembatettsü, ta paisa ashi.
Angh-isa, ninang mojitsü, mozü aketba süngoliotem aser süngdongtem yokdoktsü atema sen tarulen lenmang bushiba ajanga aluyimertem ajangzüktsü aser lanurtemi sobaliba dak sendakba sübosolemtsü aser teka agi yangluba osettem South East Asia market ama nung yokdoktsü atema lenmang bushitsüla, ta tayongzükba agütsü.
“Asen state nung education system, power & energy, communication aser lenmangtem nung temelenshi nüngdaker. Iba wadang nung zünger aliba asen Naga nunger lanur 3000 nem inyakdaktsütsüla” ta Angh-isa shisem.
Sentong nung Nagaland Chief Minister, T.R Zeliang-i Hornbill Festival tembang o jembidang, “asen state nung taruba küm 15 atema asenoki asen mangdang aser alizüng ayur” ta ashi.
“Lanurtem asoshi mapa, tetsürtem tashi itdaktsütsü, asen senotsü tarulen jenjang tajungba kümdaktsütsü aser state sasep nungdang masü saka asen kidanger linüktem den tesentaktep tajungba akümtsü atema iba vision document sayar” ta T.R Zeliang-i ashi.
Nagaland Vision 2030 ya mapa küma inyaktetsü atema Angh aser Nagaland nung alirtem ajaki sorkar den amalitepa yaritepdaktsünür, ta paisa ashi.
“Nagaland nung ali rongsen peria lir saka iba rongsenji lanu putu asoshi lir. Anungji, vision document ajanga lanurtem nem tashi aser maongka, aser mapa angutsü onüktem tongti süa benoka lir” ta Planning & Coordination, Evaluation, Monitoring Cell and Taxes Parliamentary Secretary, Neiba Kronu-ia metetdaktsü.