Angh-i NH & APO dang mepishir

Dimapur, January 6 (TYO) : January 6, 2016 nü Joint Action Committee (JAC) on Women Reservation-i Nagaland Angh nem tezüluba ka nung Municipal election nokdangba aser kin telok kari tetsürtem dena candidate tem amokmerenba atema tiyongtsü nung mapa kar inyakang ta mepishi.
Iba dak sendakba nung tanü Angh-i mapang balala nung Naga Hoho aser Angami Public Organization (APO) ketdangpurtem jaoka senden amen.
NH President, Chuba Ozukum aser Assembly Secretary Elu Ndang nati Angh den ajurutepa senden amendang, Angh-i Naga Hoho dang election timi agidaktsütsü aser amokmerenba agientsü atema mepishi, ta OSD to Governor, Raj Bhavan, Kohima sangdong ka nung metetdaktsü.
Iba mapang Chuba Ozukum-i ashiba agi, Executive-i pei pei kin teloktem dang municipal elections dak sendakba onük asoshi telemtetba agitsü mapa lemzükja lir aser nüngdak dang süra, sorkari tribal Hoho ajak jaoka külem senden ka amentsüla aser ano election atema nominations mapang atsülangtsü akok.
Ano külen, APO President Dr. Vilhusa Seleyi-i anir ketdangpur teneti Angh den ajurutepa senden ka amen.
Iba mapang Angh-i APO dang Sorkari sangdongba ama Municipal/Town Council elections agidaktsütsü aser kin nungi jendoktsü ta amokmerenba agientsü mepishi, ta OSD to Governor-isa sangdong nung metetdaktsü.