Angh-i NSCN(K) telok yimjung nung ken o jembidaki ajar

Kohima, Jan 26 (TYO) : Linük ajunga den külemi Nagaland nunga 67 buba Republic Day Mongolbar nü kecha timtem lendong melii mongogo aser iba sentong nung jembidang, Nagaland angh, Wb.P.B.Acharya-i NSCN-K telok dang yimjung nung ken o jembidaki arutsüla ta metetdaktsü.
Nagaland nung district terka den sub-division headquaters balala nung kilonsertem aser Parliamentary Secretary-tem oa denogo aser Kohima nung kasa anogomong sentong Secretariat Plaza nung alidang Nagaland angh, P B Acharya-i linük nisan salatsü. Iba mapang tsüngkangmedem jajartem telok 21 kati shilema agia tongti tesemdanger nem salem agüja liasü. Iba kasa sentong nung Nagaland Chief Minister T R Zeliang-a dena liasü.
Iba sentong nung jembidang, ” asenoki iba Republic Day ya kanga pelaa amonger, kechiyong iba yagi asenok nem kin kidong kecha mapitepi senso ajak nem kasasa temeten aser nüjiso agütsür,” ta paisa metetdaktsü.
Nübortem junga alitsü aser rongsenren nung terenlok lia inyaktettsü atema tamasa yimjung nüngdaker asünungji, Naga nunger yimten tebilemtsü latettsü asoshi tamendakdak ken o center sorkar o NSCN-IM na tsüngda August 3, 2015 nü renembaji kanga tongtibang ka asütsü, anungji ibaji ajaki pelashishia agizüktsüla ta anghi-sa metetdaktsü.
” Iba yagi asenok timtema aliba mapang ya teti asoshi tatembang kati arua telatetba kati arutettsü,” ta paisa ashi.
Naga nungertem ya küm aika timtema arur asünungji, iba ama azü tokshi maparentem agi Naga nunger mulungjang menenja lir ta anghisa metetdaktsü.
” Asenoki taoba mapangtem nem asenok mekokdaktsütsüla aser asenoki asenoksasa asenok tensa tia yanglutsüla,” ta paisa ashi.
Iba sentong nungsa jembidang, Nagaland angh-i NSCN-K aser tanga teloktem shirnoksa yimjung nung mali, parnok ajak dang tashiyim mapa toktsür ken o jembidagi arua yimjung nung telatetba bushitsübaji nübortemi mulungba lir ta metetdaktsü.
NSCN(K) telok ya center sorkar den küm 14 tashi yimjung nung lia arur March 27, 2015 nü yimjung mapangji raksar India sepaitem den tsükchitep tenzük. Iba jagi center sorkari parnokji ban sütsü.
Kasa sentong nung state sorkari inyaktetba mapatem indang ashidang, 2015-16 küm tsüngda Nagaland nung tsük metric ton lakh 6.8 ruogo aser iba jagi hectare ka nung tsük  seret 2,270 aruba asadangtetter.
Ano, Horticulture department-ia süngdong nung atangba bengana Naga Tree Tomato ta ser Geographical Indication (GI) Registry nung idaktsüogo. Iba jagi Nagaland nungi GI tenüng amshitsüsa shimtetbaji Naga King Chilly sülenbo Naga Tree Tomato ya asütsü.
Paisa ashiba agi, Pradhan Mantri Krishi Sinchayee Yojana (PMKSY)  kübok tzülu ayimtsü asoshi minor irrigation ajanga tzü bener arutsütsü aser küm pongo tsüngda hectare 5000 nung coffee lu ayimtsü sorkar sentong nung lir.
Ano, angh-isa ashiba agi, Swachh Bharat Mission kübok ki 25,000 nem metsümeshidak yanglutsütsü aser merükmejudak 345 yanglutsütsü 2015-16 sentong lir.
Electric tashi agütsübaren nunga tan January 29 nü Mon district nung 1 MW Tehok Mini Hydro-Electric Project semzüktsü ta angh-isa metetdaktsü.
Ano, tan January 15 nü  Chumukedima nung  Passport Seva Kendra lapoktsüba Naga nunger asoshi küm tasen sempet asütsü aser iba jagi joko Naga nungertem passport yanglutsü atema tanga state-i aotsü menüngdaker ta    anghisa pelaba o ka metetdaktsü.