Angh-i NTAC. Kohima den ajurutep; Mokdang agiener

Dimapur, February 20 (TYO) : February 19, 2017 nü Nagaland Tribes Action Committee (NTAC), Kohima-i Nagaland Angh den ajurutepa state nung tensa indang osang lemsatepba sülen ghonda 18 tsüngda, tanep 10:00 ako nung Angh-i NTAC, Kohima den ajurutepa, TR Zeliang den par Council of Ministers anenba sülen sorkar tasen ka kümtettsü indang mapa inyakba osang metetdaktsü, ta Media cell NTAC Kohima sangdong ka nung ashi.
February 19, 2017 aonung 8:00 ako nung T.R Zeliang den par Council of Ministers anenba shidi pa nem agütsü aser iba sülen lennir tasen ka kübok sorkar tasen ka tentettsü atema mapa inyakdar, ta Angh-i NTAC ketdangpurtem dang ashi.
Iba nung ajemdaker NTAC, Kohima-i Hombar nungi tenzüka Nagaland ajunga mokdangba agientsü aser Naga nungertem taginüba tongtettsü aser loktiliba nung nisung ajak tiptema alitsü atema mapa inyaktsü nung temulung agütsütsü telemtetba agi, ta sangdong nungsa ashi.
Sorkar tasen jagi nübortem taginüba ama inyaktsü aser nübortemi ola adokba ama tashi anga maparen inyaka aotsü imlar, ta NTAC-isa metetdaktsüogo.
Tanü NTAC convenor, K.T Vilie-i osangbener sen sensaksemdang NTAC tentetba indang osang metetdaktsü.
Paisa, kin Hohotem aser public-i mapa inyakba piyong nungita yaritepba atema pelaba metetdaktsü.