Angh-i par chirnur artsütsü temeten lir: ACAUT

Dimapur, December 09 (TYO): Nagaland Angh-i par chirtem arrtsütsü temeten lir, kodang par chirtemi auyadir, tebu kati kodanga ola madoki melitettsü; Angh-i tanurtem merenshitsü atema lemtetba ama teüiba Angh kati danga meinyakdang, ta Media Cell ACAUT Nagaland-i sangdong ka ajanga metetdaktsü.
“Tebutiji jashir, kechiyong par chirtemi tajung kata meinyak saka ochimashi ka nungi ka, ta dang bener arutsü, itemji Mid-day meal ochimashi- tang koba Vigilance Commission-i bushisüngdangdar, sen crore 500 indang totzü meyoktepba ochimashi, sen crore 1200 wheat ochimashi, backdoor appointment ochimashi, tesayurtem itasen magütsüba ochimashi, sen crore 100 pension ochimashi, CAG report 2015-16 nung F&CS department sen crore 300 dak tema tim mesüi amshiba, MNREGA ochimashi, Roads & Bridges department densema lir,” ta sangdong nung shia lir.
Anungj, Angh, PB Acharya-i jembiba o NPF party-i meyiptsütsü melena parnok merenshibaji kanga pelaa agizüktsüla. Sorkar nung shilem aliba Angh kati kodang yimjak nung par sorkar anema nokdakdir, atangji küm 13 NPF sorkarji state putiotsü nung ochimeshitiba sorkar ta asütsüla. Anungji tasütait Angh-i taruba budget sendenji “Ozü ochimashi sorkar” ta ser tenzüktsüla” ta ACAUT Nagaland-isa ashi.