Angh-i Rashtriya Ekta Diwas tenüng nung ayongzüker

Dimapur, October 26 (TYO) : Rashtriya Ekta Diwas (National Unity Day) ya 2014 küm India Prime Minister, Narendra Modi-i tenzüktsüba sentong ka lir, ta Nagaland Angh P.B Acharya-i sangdong ka nung metetdaktsü.
Iron Man of India, Vallabhbhai Patel nem tetushi agüja National Unity Day amunger. Iba anogomung ajanga asen linük tashi itshidaktsütsü aser tangar dang nungi kümzüka yutettsü tangatetba agütsür.
Taküm asoshi omenji “Nation Salutes Sardar Vallabhai Patel on Rashtriya Ekta Saptah” lir aser October 31 nü pa asoba anogo nungi November 6 tashi amungtsü, ta Angh-i sangdong nungsa shia lir.
Taküm asenoki Iron Man of India nem tetushi agütsüba dang masü saka asen linük nung telongjem tashimait kümdaktsüba naxalism aser telungpur khurettem takok ngua inyaktsü merangdi, ta Angh-isa tayongzükba agütsü.
“Iba anogo nung asenoki nüjiso atema rarar, Rani Ma Gaidinliu aser lar sepaitem bilemteter. Naga nunger lennirtemi alar tia nungi nüjiso angutsü atema British nunger anema rarabaji kanga senti mapa ka ta ni züngshir. Asen linük nüjiso atema taküm bendanga agütsürtem tanü asenoki bilemeter” ta P.B. Acharya-isa shisem.
October 31 nungi November 6 tashi NGO, lanur teloktem, higher education institutions aser college temi Rashtriya Ekta Saptah benjung amungtsü atema ni mepishir, ta paisa metetdaktsü.