Angh-i RMSA tesayurtem dang lungkak aitba anentsü mepir

Dimapur, September 16 (TYO) : Nagaland Angh P.B Acharya-i Rashtriya Madhyamik Siksha Abhijan (RMSA) tesayurtem dang kaketshirtem ajangzükdaktsütsü asoshi lungkak aitba anenang ta mepishia metetdaktsüogo.
Tesüiba ita trok tashi itasen magütsüba agi Nagaland RMSA Teachers’ Association 2013 (NRMSA) 2013 züngsemtemi August 21, 2015 nungi school-i moi lungkak aittsü tenzük.
Tesayurtemi mapa meinyaki lungkak aitba ajanga kaketshirtem takoksa ajurur aser talisa sorkari lapokba school tem nung kaketshirtem shisaliok angazüktsü temeten magütsür. Ano academic year tatembangleni arur anungji tesayurtemi lungkak aitba anentsü ayongzüker, ta Acharya-isa metetdaktsü.
Angh-isa, state sorkari tekaratiba nung itasen agütsütsü atema mapa inyaktsü tetuyuba ka agütsüogo.