Angh-i Teachers’ Day salem abener

Dimapur, September 4 (TYO): Angh Acharya-i sangdong ka nung Nagaland nung aliba tesayur ajak dangi Teachers’ Day salem metetdaktsü aser tenüngsang agütsüogo.
Tesayurtemi asen tanurtem dang shisatsu aser yimyatsüyatem sayuba aser linük asoshi bendanga agüja inyakba mapatem asenoki Teachers’ Day nung ang ajiteter, ta Angh-i ashi.
Loktiliba ka nung tesayur ka indang mapaji jenjang aketba mapa ka ama züngshir aser takok anguba nisung ajaki pei school tesayurtem kodang mamar aser menungra bilemteter. Ajisüaka, tanü sen meimba yong education ya business ka ama dang kümogo, ta Acharya-isa ashi.
Nija school tesayurtem den medemdangra, sorkar school tesayurtem itasen tajung angur saka sorkar school tesayur kari pei melena proxy tesayur nem inyakdaktsür. Iba mapaji kari dang inyaker saka Tsüngrem aser sorkari tadok magütsütsü anungji iba inyakyim anentsüla, ta Angh-i metetdaktsü.
Nenoki tanü kaketshirtem dang sayubaji parnok taküm nung teti alitsü. Nenok ya loktiliba yanglurtem lir, anungji nenoki loktiliba nung temelenshi tajung bener arutsü atema mapa inyaktsüla. Tanü nenoki sayuba kaketshirtemji loktiliba asoshi rongsen ka ka südaktsütsü merangang, ta Angh Acharya-isa ayongzük.