Angh-i Union Minister tem den ajurutep

Dimapur, March 10 (TYO) : March 9, 2017 nü Nagaland Angh, P.B. Acharya-i New Delhi nung Union Minister of State (Independent Charge), Ministry of Culture, Dr. Mahesh Sharma den ajurutep, ta PRO, Raj Bhavan sangdong ka nung metetdaktsü.
Iba mapang Acharya aser Dr. Mahesh Sharma nati Nagaland indang sobaliba ajungkettsü indang tebilembatem lemsatep aser idangji Angh-i sobaliba dak sendakba sentongtem agitsü asoshi Nagaland nung multipurpose community hall ka yanglutsü tebilemba shidang, ta sangdong nung ashi.
Iba onük asoshi shisadangtsü ta MoS Dr. Mahesh-ia nangzük. Angh-i Dr. Mahesh den ajurutepdang Dr. Lozhoho Khamyo-i anir Japfuphiki Pfutsana Keseko (Indigenous Society Organization), Nagaland teshimtet telok ka liasü, ta PRO sangdong nungsa metetdaktsü.
Maneni Angh-i anir Nagaland nungi teshimtet teloki Union Minister of State (Independent Charge) Ministry of Minority Affairs, Mukhtar Abbas Naqvi dena ajurutep.
Iba mapang parnoki Nagaland nung kin shia indang maitsü, sobaliba aser inyakyimtem kümzüka ayutsü atema tebilembatem lemsatep, ta PRO, Raj Bhavan sangdong nungsa shia lir.