Angh-i World Environment Day salem metetdaktsür

Dimapur, June 4 (TYO): Nagaland Angh, PB Acharya-i World Environment Day tepela salem lemsatepba den külemi iba anogomung nung asenoki alima wazüka aser kümzüka ayutsü tenangzükba agishitsü imlar ta metetdaktsü.
World Environment Day ya lipoküm aser alima kümzüka ayutsü atema osang sangoktsüba anogo ka lir. Iba anogo nungsa lipoküm kümzüka ayutsü atema sentongtem atonger, ta Angh-i sangdong ka nung metetdaktsü.
World Environment Day ya mezüng 1974 küm nungi amungtsü tenzük aser tang India dena linük 143 nung ayongzüka amunger. Taküm iba anogomung atema omenji ‘Connecting People to Nature’ lir, ta paisa ashi.
Iba tobur tajung Nagaland state nung alemli nungi nisungtemi lipoküm den kanga dang putepa liyonga aru. Ajisüaka, tia maka industrialization, urbanisation aser nisungtemi teka aiba ajanga asen lipoküm mejungi kümogo. Küm ishika tejakdang nungi Nagaland aser nübortemi lipoküm wazüka ayutsü aser kümzüktsü atema tebilemtsü bena mapa inyakba angudang kanga pelar, ta Acharya-isa ashi.
Paisa, sorkar department aser teloktem, shisaliok rejutem, alima meimertem, shishilembartem, mulungtet teloktem lipoküm wazüka ayutsü aser iba jagi tarutsü pututem atema jenjang tajungba kümdaktsütsü atema mepishia metetdaktsü.