Angh-i yimtenren nung timtem adokdaktsü: NCP

Itanagar (Arunachal), February 14 (Agencies): Honibarnü NCP-i, state Angh, J P Rajkhowa-i Arunachal Pradesh yimtenren nung timtem adokdaktsür, ta aitsü.
Arunachal NCP Tir, Gicho Kabak-i, tang state yimtenren tensa ya BJP-i state nung democracy inyakyim nung shimba sorkar atsüngdoktsü merangba ajanga lir, ta ashi.
“Angh ajanga BJP-i sorkar tashi mechi nung Temzüngtem raksatsütsü meranger. Iba ama tensa tanaben majurutsü atema tangbo Angh-i kanga kümdangtsüla,” ta Kabak-i ashi.
“Angh-i state yimsüsüba tashi aginer aser iba atemaji Centre-i Arunachal nung President’s Rule benokba ajanga pa nem tashi agütsü. Tangbo joko pai terenlok mapa nung timtem magütsüi state junga yimsü asütsüla,” ta paisa ashi.
Angh atema yimjung aser security ji kanga tongtibang onük asütsüla aser state sorkari inyakba terenlok mapa nung timtem magütsüi junga inyakdaktsütsüla,” ta Kabak-isa ashi.
NCP leniri Angh dang sorkar mapatong aser programme balala nung timtem magütsüi inyakdaktsütsüla ta mepishiogo.
Terenlok mapatem nung tetsükdaktsü bener arutsüra nüburtemi iba anemaji apusotsü, ta NCP-i tekümdangtsü olen ka metetdaktsüogo.
Parnokisa, Arunachal Pradesh nung President’s Rule benokba sülen state semdanger raliwalirtem kanga ajema kümogo aser shishilembabaren nunga jenjang mejungi kümogo, ta ashi.