Angh La Ganesan-i kaketshirtem den sensak asem

Dimapur, Aami/June 29 (TYO): Nagaland Angh La Ganesan-i June 29 nü Dr. Imkongliba hall, Raj Bhavan, Kohimanung  Zeliangrong, Heraka School, Tening School managing Committee züngsemtem aser kaketshirtem den sensaksem sentong ka ayongzüka agiogo.

Sentong nung o jembiba mapang Angh-i, iba school ajanga Assam, Manipur aser Nagaland kübok yimtsüng 25 nungi kaketshirtem ajangzükba ngua kanga pelar ta ashi. Paisa, iba school nung azünger kaketshirtem timba tekübokba jenjang nung aliba kibongtem nungi lir aser iba institute nung inyakba tesayurtema honorary social worker tem lir ta ashi.

Pai, iba school mezüng amenokba mapang primary school ka dang liasü saka tangbo high school ka kümogo aser school ajanga Nagaland dang masü saka Assam aser Manipur nata ajangzüker, ta ashi.

Angh-i ashiba agi, tribal tem lenla ajak nung renlokdaktsütsü asoshi school nükjidong aliba ngua pa kanga pelar.

Maneni Angh-i, kaket shisatsü ajanga sobaliba kümzüka aser wazüka ayutsü atema nüburtem nem tashi agütsütsü ta ashi. Pai ashiba agi, school inyakyim ya takdang telung nung sayuba dak dang rangloker malitsüla. Paisa, institution dang personality Development camps, state balala semdanga senzüba, Science tours, State level aser National jenjang nung Children Science Congress nung shilem agiba, Literature tetiktepba ayongzükba, cultural Days amala sentong balala ayongzüka agitsü ajungshia, koba kaketshirtem lenla ajak nung terenlok asoshi tanü educational system nung shilem ka lir ta ashi.

Angh La Ganesan-i, school nükjidongji kin balala longjemdakja linük tashitaitba kümdaktsütsü asoshi lir, koba tanü kanga nüngdaka lir, ta ashi.

Angh-isa, 2011 nungi küm 13 atonga HSLC tatidang nung school-i 100% pass result ngutetba atema kanga pelaba lemsatep. Iba takok ya kaketshirtem, tesayurtem aser school management-i kanga meranga inyakba kuli lir, ta pai ashi.

Administrator, ZHS, Tening Talmsi Newmai-i, school establishment, nükjidong, takoktem aser inyakyim indang metetdaktsü. Laisa, kaketshirtem ajangzükdaktsütsü atema iba sensaksem sentong ayongzükba atema Angh dang kanga pelaba lemsatepa liasü.

Sentong nung kaketshirtemi sobali tsüngsang aser kentem agi lokti ayongzüka liasü.