Angh La Ganesan-i Mokokchung semdang

April 13 nü Mokokchung semdangba mapang Nagaland Angh La Ganesan aser sorkar tenzükertem aser lokti tentet balala lenirtem DCs Conference Hall nung senden amenba mapang tangokba noksa nung angur.

Dimapur, Rongchii/April 13 (TYO): Nagaland Angh La Ganesan-i April 13 nü Mokokchung semdanga office balala tekolaktem aser district kübok lokti tentet balala nungi lenirtem den senden ka mena liasü.

Senden nung o jembiba mapang Angh-i, pai tang mezüngbuba district semdanger ajisüaka pai, lenla balala nung mezüngpurtem asüba aser state aser North East nung jilatem rongnung temerektiba ka ta asübala Mokokchung district aser Aoertem indang osang tajung aika angashir liasü, ta ashi.

Angh-isa tawa tembangba General Election nung district nung aliba nüburtemi shilem tajung agiba atema tenüngsang agütsü aser nüburtemi shilem agi nungdang temzüng ozüng benoka inyaksangshitettsü ta ashi. Pai, lokti tejakdangi renloka odi ta süra election inyakyim aser electorates tem sentoka metoktsütsüla ta ashi.

Nüburtemi anogoshia tenüngdakbatem indang jembiba mapang Angh-i, education, health care, tajemtsü tzü aser financial institutions amala tongtibang tenüngdakbatem nüburtem kishizüng tonga bener otsütsüla aser talisa tekübokba jenjang nung alirtem atema jenjang tapet agitsütsüla ta ashi. Paisa, kanga dang tongtibang maparen dak sendaka aliba department ketdangsürtem dang nüburtem ajangzükdaktsütsü atema sorkar sentongtem nendaka benoka inyaksangshitsü ajungshia liasü. Angh-i, Deputy Commissioner dang district nung scheme aser sentong balala benoka inyaksangshiba mapangshia lepa reprangshitsü aser metongmejen lira nükjdong atongtsü atema jenjang tapet agitsü asoshi mepeshia liasü.

Maneni Angh-i, Nagaland nung yimden yimsüsüba tsütsü tebilemtsü aliba ya yakta bentettsü aser Nagaland ya linük nung tanga tesemtem den jangyu medema yimjiyimjung nung aotsü tamang akaba lemsatep.

Senden nung Ao Senden, Watsu Mungdang, AKM, GB Union, All Ward Union, MCCI  aser tanga lokti tentet balalai parnok tebilemtsütem lemsatep aser ULB Election, Naga Solution, Women empowerment, Civil Service Project (UPSC aspirant Trust Fund), Mokokchung nung tajemtsü tzü agi timtemba, district ajunga nung lenmang jenjang mejungi aliba amala onük dak sendakba nung parnok tebilemba lemsatep. Iba dak sendakba nung Angh-i, pai ken o dak sendaka aliba minister tem aser Chief Minister dangi shiti yoktsü ta ashiba den pai akokba tashi teyari agütsütsü merangtsü, ta tenangzükba agütsü.