Angh P.B Acharya-i Peducha nung metsümeshidak lapoktsü

Dimapur, August 30 (TYO): August 30, 2015 nü Nagaland Angh, P.B. Acharya-i Peducha nung metsümeshidak lapoktsü.
Peducha nung yangluba metsümeshidakji senzüsenbongertem aser ano yimdaklirtem atema BRO, Project Sewak ajanga yangluba lir.
Swach Bharat Abhiyan kübok Chief Engineer (Sewak) Vinod Kumar aser Commandant 15 BRTF, Colonel S.P Yadava na lenisüba nung iba metsümeshidak yanglu.
Metsümeshidak lapokba sentong nung Peducha Chairman, Neimehel Neikha-i Angh dang pelaba metetdaktsü.
Yim tila ka dang süaka Angh-i Peducha nung metsümeshidak yanglutsü shimba atema kanga pelar, ta pai ashi.
Sentong nung Commandant 15 BRTF, Colonel S.P Yadava-ia o tatsüka jembidang Angh-i parnok nem iba mapa inyaktsü nungloktsüba aser ano pai arua lapoktsüba atema pelar, ta ashi.
Colonel S.P Yadava-isa Chief Engineer (Sewak), Vinod Kumar dang pelaba ashi aser maneni Nagaland nung alirtem yaritsü mulunga lir ta paisa metetdaktsü.
Tanü P.B Acharya-isa Phesama nung anentsüh aludak semdang aser iba lendong ajanga timtem ajururtem yaritsü atema sen lakh ka tenla agütsü.
Angh-i anentsüh reprangdangba sülen Phesama Village Council aser takoksa ajuruba kibongtem den ajurutepa sensaksem.
Nagaland nung lendong tulu atalokbatem rongnung Phesama anentsüh ya ka lir aser pai yimdaklirtem den khuret lemsateper, ta Acharya-i ashi.
Iba tensa ajurudang yimertem tasü aittsüla aser kati ka ajungshiteptsüla aser takoksa ajuruba kibongtem yaritsüla. Iba tensa nung tangar mesüra bangdakpur dak tai metongloktsüi pei sasa yariteptsüla. Iba tangatetba yimer lennirtemi pei sensopurtem dang angatetdaktsütsüla, ta Angh-isa ayongzük.
Sentong nung MLA, Vikho-o Yoshu-i Angh dang pelaba ashi aser pa tsüngdong tonga arua tesem semdangba ajanga iba tensa nung nüngdakbatem peria angutsü imlar ta paisa shisem.
Kohima Deputy Commissioner, Rovilatuo Mor IAS-i Nagaland Angh meiner aru aser pai Phesama Village Council den ajurutepa senden ka agi.