Angh P.B. Acharya-i Raksha Bandhan salem abener

Dimapur, August 18 (TYO) : Nagaland Angh, P.B. Acharya-i Nagaland nung alir ajak dangi “Raksha Bandhan” salem metetdaktsü.
“Raksha Bandhan benjung nung tetsürtemi tebur nem Rakhi alenloktsür aser temoatsü meshitsür. Iba inyakyim ajanga kinunger tsüngda tesentaktep akangshir aser iba anogomung nung ni nübortem ajak dang azükasu aser yimjung aliba India kümdaktsütsü ayongzüker,” ta Acharya-i sangdong ka nung ashi.
Angh-isa Nagaland nung yimjung aser azükaru bener arutsü atema nübortem longjemtsü ayongzük.
Paisa, tanur tetsür-tebur lemdangba aser tepok nung lia tetsür tanurtem raksa endokba mapa anentsü atema mepishia metetdaktsü.
Bati Bachao Beti Padhao Scheme kübok tetsür tanur ka yaritsü akok aser küm nung Rs. 2,500 tenla agüja parnok shisaliok bushiba nung yaritettsü. Tetsür tanur yarinürtemi SBI Kohima main branch, IFSC : SBIN000214 nung Beti Bachao Beti Badhao scheme kübok SBI A/C No. 35843617072 nung sen enoktsütsü akok, ta Angh-isa metetdaktsü.
Sen enoktsüba sülen Raj Bhavan, Kohima den tongteprateptsü akok, ta paisa shisem.
“Angh-isa nübortem dang Linük Temzüngi melaba ama tetsür nem shilem 33% lemzüksüba pusema nungittsü atema mepishia metetdaktsü. Sorkari tetsürtem tashi itdaktsütsü aser yimten mapa dena wadang balala nung maongka agütsütsü atema telemtetba shitak agiogo,” ta paisa shisem.