Angh P.B Acharya-i SNIC sentong nung aden

January 14, 2017 nü Patkai College Dimapur nung SNIC tembangba sentong nung ADG, North East region-i Nagaland Angh nem sempet agütsüba noksa nung angur.

Dimapur, January 14 (TYO) : Patkai College nung ayongzüka agiba Special National Integration Camp (SNIC) tembangba sentong nung Honibarnü Nagaland Angh-i tongti tesemdanger ama shilem agiogo.
Shisaliok bushiba mapang, kaketshirtemi shisatsü angazüker saka iba ama camp nung adentsü senso tajung ka akümtsü atema tesayubatem angazüker, ta Angh Acharya-i o jembidang ashi.
India ya democratic linük ka lir aser ‘second class citizens’ shinga mali. Anungji, asenok ajak kasa dang lir aser linük ka küma lokteptsü atema inyakba mapa nung lanurtemi shilem agitsüla, ta paisa ayongzük.
“Lanurtemi degree angutsü atema dang masü saka skill development atema bilemtsüla. Tajangzüker kati tangar nem meyipa magütsüra, ibaji tim masü” ta Acharya-isa ashi.
Bill Gates indang atishia jembidang Angh-i takok angur nisungtemi linük nem meyipa agütsütsüla, ta ashi.
Tanü 1st Nagaland girls Battalion NCC Kohima-i Angh P.B Acharya nem Guard of Honour tetushi agütsü.
January 4, 2017 nungi tenzüka agiba SNIC nung linük tesem balala nungi cadet 600 shi ka aden.
Hopta ana camp nung games & sports, cultural exchange, debates, solo, group song & dance competitions amalatem atonayongzüka agi. Maneni cadet tem Kohima-i educational tour atema anir ao.
Tanü SNIC tembangba sentong nung ÀDG, NER, Major General RGR Tiwari, camp commandant Brigadier MS Nikam aser Patkai College Principal, Epao nungertem aden.