Angh, P.B. Acharya-i Temjen Imna nem tenüngsang agütsü

February  23, 2017 nü Raj Bhavan, Kohima nung REM group Chairman aser MD, Wb. Temjen Imna Along Longkumer (ajichi)-i state Angh, P.B Acharya ajurudang tangokba noksa ka angur. 

Dimapur, February 23 (TYO): Tawa REM group Chairman aser MD, Wb. Temjen Imna Along Longkumer-i “Leadership Excellence in Social Entrepreneurs” International Award agizükba atema Nagaland & Arunachal Pradesh Angh, P.B.Acharya-i pa nem tenüngsang agütsüogo, ta Raj Bhavan sangdong ka ajanga metetdaktsü.
7buba Middle East Business Leadership Awards 2016 sentong ya February 17, 2017 nü Inter-continental London park lane nung ayongzüka kaogo.
Angh, P.B.Acharya-i, iba Award anguba ajanga REM Group-i nüburtem atema inyakba aser parnok indang Corporate Social Responsibility (CSR) shilem ka ama loktiliba atema inyakbaji alimai metettsü imlar, ta kasa sangdong nung shia lir.
Angh-isa, parnokisa tarutsü nunga maneni asen lokti terenlok atema inyaktsü imlar, ta ashiba den külemi tarutsü nunga parnok maparen nung takok ngudakjang ta sarasademtsür, ta kasa sangdong ajanga metetdaktsü.