Angh P.B Acharya-i Women Helpline-181 tenzüktsüogo

Dimapur, June 23 (TYO) : Brihostibarnü District Hospital Dimapur nung Nagaland aser Assam Angh, P.B Acharya-i Women Helpline-181 tenzüktsüba den külemi Sakhi-One stop Centre lapoktsüogo; item ya nija aser lokti nung tetsürtem anema benshiba ajanga takoksa angur tetsürtem yaritsü atema lir.
Iba sentong nung jembidang Acharya-i, tanü lokti nung tetsürtem lenla ajak nung tejaklen odar. Tetsürtemi kibong ketdangsüba, tanur anepaluba aser lenla ajaklen shilem tajung agir, ta ashi.
“Item ajak inyakaka khenkhenbo tetsürtemji mesükshir aser sen meimba yong meimchir ama mesükshir, iba tangatetba ya asenoki melenshitsüla,” ta Angh-isa ashi.
Pai ashiba agi, aiben tetsürtem anema benshirtemji kinünger aser temeimertem dang inyaker. Tetsürtem ya asen tetsütem, aianutem aser asen jalatem lir.
Iba project ajanga tetsürtemi ajangshiba tebilemtsütem atema inyaktsü imlar ta shia pai lokti lenirtem ajak dang tetsür anema inyakba mapatem ajema akumtsü atema yaritepa inyakdaktsüner, ta mepishi.
Kasa sentong nung Social Welfare & Parliamentary Affairs Minister, Kiyaneilie Peseyie-ia, tetsürtem kümzüka alitsü atema yariteptsüla, ta mepishi. “Asen lima nung telongjem, yimjung aser azükaru alitsü atema asenok ajak longjemer inyakdi,” ta paisa ashi.
D.C Dimapur, Kesonyu Yhome-ia, tetsürtem atema project tenzükba ya mapang tetemsü ka nung tapet tenzükogo, kechiyong lokti tebilemtsü ka ama tetsürtem anema inyakba teilemtsütem atema rongdak inyaktsü nüngdak, ta ashi.
Sentong nungsa Nagaland State Commission for Women Mendenbula, Dr. Temsula Ao-i, tetsürtem anema inyakba ya anogoshia teimba akumer aser item ya meyipa repranghsitsü nüngdak, ta metetdaktsü.
Laisa, “Kechiba asenoki item ama centres nüngdaker (?) asenoki asensasa iba ya asüngdangtsüla, kechiyong amokmeren tulutibaji telung nungi lir,” ta ashi.
Social Welfare Secretary, Dellirose M. Sakhrie (IAS)-i okila jembi aser State Resource Centre for Women, Nagaland Mission Director, Daisy Mezhur-i lokti pela agizük.
Sentong mendenbuba Social Welfare Director, T. Merang Aier liasü aser Nagaland State Social Welfare Board Mendenbuba, Bano Vinito-i tepela anküp o jembia tembang.