Angh P Rajkhowa dangi dy speaker T N Thongdok-i shidi ka yok

Itanagar, February 9 (Agencies) : State nung Tir yimsüsüba mapang deputy speaker teinyaktsü lir mali ta asüngdanga T N Thongdok-i shidi ka züluba nung Raj Bhavan-i law secretary tebilemba meshiogo.
February 4 nü züluba shidi nung, Raj Bhavan-i pa dang pa indang nüngdakba züluzüpong ajak anago ananü tsüngda Angh ket tongjang ta metetdaktsüba ajanga aika aoksatepa liasü.
Supreme Court dang state ajanga Tir yimsüsüba tebenok ta temepishiba agütsür osang ataba mapang ka nung state nung sorkar nungi medeni aoba MLA tem BJP teyari ajanga sorkar kümdaktsüba atema Nabam Tuki-i aniba Congress party-i state Angh J P Rajkhowa kanga kara aitsüogo.
Taoba mapang chief minister Nabam Tuki atema otongdar Geetartha Darshan Barua-i, “Ochi mashirtemi Angh anisar aser pai telemtetba ajak kar taginüba dak ajemdaker dang agir. Deputy speaker-i züluba shidi ajanga Angh tena tesentaktep sayur. Supreme Court telemtetba matai BJP teyari agia sorkar ka kümtettsü tena tebilemba lir,” ta ashi.
Yaküm December 16 aser 17 anogotem nung lemtetbatem, tang nisung pongu agi akümba Constitution Bench-i angadangdar, ajisüaka January 13, 2016 nü Gauhati high court order ajanga speaker office nung tang mapa mali ta tetuyuba agütsüogo, ta Thongdok-i züluba shidi nung lir.
Supreme Court-i tang state nung Angh ka teinyaktsütem dena reprangshidar.