Angh PB Acharya-i “Ekarikthin-2016” lapoktsü

Dimapur, March 18 (TYO) : Nagaland Angh, B. P. Acharya-i National Institute of Technology Nagaland nung “Ekarikthin-2016” ta ser anogo ana Techno-Cultural festival lapoktsü.

Hokolbarnü Angh Acharya-i iba benjung lapoktsüdang ashiba agi, nisung kati pei maitsü wazüka ayutsübaji kanga tongtipang.

Kaketshir kati higher education alizüng yur azüngdang, pei tetsü oshi mamadoktsüla. India ama democratic aser secular linük kaa nung pei tebilemba lemsateptsü indang temeten lir aser senso ajak kasa dang, ta paisa metetdaktsü.

Tamangba yimsü ajaki nisung ka tajungba akümtsü tesayuba agütsür saka linük anema nüjiso yimyim ayimbaji magizüktetba inyakyim ka lir, ta PB Acharya-isa shisem.

India nütsüng yongsük noklang nung shilem 68 ji lanurtem lir aser ali rongsen aika lir. India linük tashi aiitsü takoktsü lenmang lir, ta paisa ashi.

Iba sentong nung Director NIT Nagaland, Dr. V. Ramachandran-i tesentepertem pela agizük.