Angh Sharma den Mizoram nung tepila sentong agi

Aizawl, Monupii (May) 29 (Agencies): Mizoram-i Tentonü Angh Lt Gen. (retd) Nirbhay Sharma den tepila sentong kaogo. Pa 2015 Monupii (May) nungi tenzüka küm asem tashi Angh ama inyaka aruogo.
Angh den pilaba sentong ka Raj Bhavan nung ayongzüka aka kong chief minister Lal Thanhawla, cabinet minister tem, tongtibang ketdangser aser political lenirtem iba sentong nung aden. Sentepa aliba lokti den jembidang Sharma-i ashiba agi, Angh ka ama pa kümsük temulungsüa inyakogo.
“Kübotsü küna idaki ka ama dang bilema liogo aser Mizo nungertemi küna dang temeim tulu sayuogo, koba küna tesem kar nungibo meyipa agütsütsü merangdangogo. Künati Mizoram kanga meima kümogo,” ta pai ashiba den Mizoram nung kanga anisüngzüka liaka pa kümsük tembanger asünung toktsütsüsa akümtsü, ta ashi.
Sharma-i ashiba agi, state nung ozüng sülen anidakba aser kaket shisatsü peria aliba nisungtem aika aliba aser parnoki yimsüsüba ren nung inyakyim tajung sayuba aser lokti libaliro tajung anguba ajanga pa kanga puaogo.
Paisa ashiba agi, Mizoram, Center-i kanga dang temulung agüja reprangdar aser tawa Tir, Tatong tir aser Ato Kilonseri state semdangba ajanga iba ya jangjaa sayur aser teimla agütsür, koba Mizoram atema tongtibang asütsü.
Arishi küm 72 tain Lucknow nungi retired army officer ya Mizoram indang Angh 22buba 2015 Monupii (May) 26 nü aküm.