Anghtemi Chief Minister tashi alema meinyaktettsü : Supreme Court

New Delhi, February 9 (Agencies) : Angh kati Chief Minister nem agüja aliba tashi alema inyaktsü makok kechiyong Linük Temzüng kübok Angh nem iba tashiji agüja mali. Anungji, loktiyimten yimsüsüba mesamadaktsütsü asoshi Angh kati tashishi malitsüsa tashi amshitsüla, ta Mongulbarnü Supreme Court-i ashi.
“Linük Temzüng kübok Angh nem tashi aika agüja mali. Pa nem tashi tera dang agüja lir anungji loktiyimten yimsüsüba mesamadaktsütsü atema ibaji timi amshitsüla” ta Arunachal Pradesh nung yimten mepetmesü indang ken o angadang Justice J S Khehar-i aniba Constitution bench-i metetdaktsü.
“Chief Minister ka aser pai aniba sorkar tashi tendangtsü atema Angh kati pa mulungka nung assembly session jazüktsü tashi mali. Anungji Angh-i assembly session alitsü jazükba ajanga pai Assembly inyakyim nung meinprongba sayur” ta Supreme Court bench-i ashi.
“Linük Temzüng-i Chief Minister aser pai aniba minister tem nem tashi balaka agüja aliba madak Angh kati tashi amshitsü makok” ta bench-isa shisem.
Arunachal Pradesh nung Angh, J P Rajkhowa-i assembly session jelia jazüka agiba anema Congress lennir balalai ken o benokba aser ano Arunachal nungi temulung masür Congress MLA temia Angh pusema nungitba ken o tem angadangdang Supreme Court bench-i iba oshidang agütsü.
Anghji ketdangsübaren nung tekolakba lir aser iba jagi pai assembly jazüka agiba ajanga telemtetba ka bener arutsü ta shisatet, ta Congress MLA tem atema okatsür senior advocate Rakesh Dwivedi-i ashi.
Iba dak sendakba nung Constitution bench-i ashiba agi, Arla 175 kübok Angh nem agüja aliba tashi nung, Angh kati House aser Houses nung jembitsü aser osang sangoktsütsü atema tashi peria agüja mali.
Supreme Court bench nung Justice J S Khehar lenisüba kübok züngsemtem – Justice Dipak Misra, Justice M B Lokur, Justice P C Ghose aser Justice N V Ramana nungertem lir.
“Iba nung khuret ka lir. Pai osangtem sangoktsütsü akok, saka osang nungji kechi lir ta asübaji tongtipang. Angh kati Chief Minister aser pai aniba council of ministers teyari aser tebilemba agitsüla. Angh nem tashi peria agüja mali” ta bench-isa metetdaktsü.
Linük Temzüng kübok Angh kati osang sangoktsütsü aser House jateptsü tashi agüja lir, ta Dwivedi-i okadak benokba ken o benoka liasü.
Tanü iba ken o angadangba mapang tembangdang Constitution bench-isa House nung Secretary-i state assembly indang osangtem agütsüba ‘sealed cover’ lapok.