Ango masü miim achir

Yaküm küm tom ka nung Dimapur aser Kohima len ango ayokdak, Andhra Pradesh nungi bener aruba angotem nung nisung tasümang yakta mashitsü atema amshiba mozü formalin dena aliba putetba sülen, Nagaland ajungalen tzümalen nungi bener aruba ango nokdangba mapang ka asenoki ajangshiogo. Iba mapang Andhra Pradesh government nungi dena ketdangsertem Nagaland-i aruagi Nagaland government ketdangsertem den kasa tebilemtsü onük lemsatepba asenoki angashiogo. Asenok tachirtem asoshibo kecha masü, mengura machitsü saka tayokertem asoshi ango yoka aliba ajungbena meyoki anentsübaji takoksa tulu lir. Item ajakji asadanger, ano tanaben Andhra Pradesh len nungisa anogo bener arutsü asoshi tangatettep ken o renemer külen bener arudaktsütsü tenzük. Ajisüaka, ano ita asem sülen tendangba nung kasa Andhra Pradesh len nungi bener aruba angotem nung formalin mozü keta aliba putetbaji tejashitsüka lir. Atangji, kümsa küm ango dak fomalin mozü alibaji asenoki memeteti chia aruogo. Asenokibo Andhra Pradesh nungi bener aruba angojiang tang puli mesüra puben tajung ama  bilema jangratema achir. Ajisüaka, item ajakto ango masü miim achir asüa ta tangang rajemer. Atangji, lenmang talang nungi bener arur asünungji, angoji tamajung makümtsü atema langkabo inyaktsüla, ajisüaka ango tamajung makümtsü asoshi nisung asoshibo miim asütsüsa mozü amshira, ibajibo nisung taküm samatsütsü inyakba mapa den kasa asütsü. Tejashitsüka, tamalenbo government ketdangsertemi tanga len nungi bener aruba shi aser ango dak tashidak mesüra miim mozü dena ali mali, itemji tendanga nübortem taküm kümzükba kangabo mangashi, ajisüaka tepelatsükaji, tangbo government nung tenzükertemi nisungtem shi aser ango achiba nungi tashidak memenadaktsütsü asoshi kanga ariabilema aser nüngsen agia inyakba angur. Angazükba agi, Andhra Pradesh nungi anogo shia Nagaland-i ango seret meyirijang ter pongo shi yoker. Tetezü, anogo shia Nagaland nung alirtemi formalin aketba ango seret paikaji achir. Iba amaji kecha tenokdangba makai senotsü ajangzükra ojang mesüra ango ngura ojang ta bilema inyaktsübaji nisung aser Tsüngrem tsüngdang tai asütsü. Nisunger asünungji, tayokertemibo tajangzük angutsü asoshi mozü amshir aser seret nunga ashioktsür. Ajisüaka, item reprangtsü asoshi government-i ita sen agütsür teinyaker yua lir, item jagi kenüamati item chiyongtsütemji tayokdaki maodang tendangtsüla. Nisungsa asünungji, ashiko tanüker aser tetendangertemiang ano tiyazüka formalin keta lir ser nung malia ta kuli agütsütsüa akok, saka ibaji peisasa pei külakoktsür asütsü. Joko, tangbo ango dang masü saka nashi, ak aser an shi ajak ya nisung aoshi achitsü ajung asü majung, ajakji jungjunga tendanger külenang yokdaktsütsüla. Iba ama chiyongtsü nung miim chisemtsüsa asenokia mekümdangi inyakbaji ayong nung ango asütsü asoshi miim mozü amshia apuba ya asütsü. Iba ama mebilemdangi morumorua inyakba ajanga asenokibo ayong nung aliba taküm ajak asütsüsa inyaker. Tanü putu nungsa balaka asenok dak tashidak tapu balala adokba ya teimbaka item ama chiyongtsü chisemba nungi adoker. Temang anema aliba ya chiyongtsü tuluka achiba agi masü saka tila süaka miim maliba chiyongtsü tajung achiba ajanga anema alir. Joko, tang amai government nung ketdangsertemi teti shi, ango aser chiyongtsü tapu balala ajak mayokdangyongi mita reprangdangtsüla aser tashidak aser miim maketba chiyongtsütem dang yokdaktsütsüla. Iba jagi tangar dang masü saka pei aser pei kinunger takümtema kümzüktsü.