Angola-DRC arrtsülen Yellow Fever mozü agütsütsü: WHO

Geneva, June 23 (Agencies): Angola aser Democratic Republic of Congo (DRC) arrtsülen rongdak Yellow Fever tashidak nungi kümzüka alitsü mozü agütsütsü mapatong ka tenzüktsü renemba osang ka World Health Organization (WHO)-i tanü, Brehostibar nü metetdaktsüogo.

“Alima tesem balala tonga iba tashidak menatepa modaktsütsü nükjidong nung mozü agütsütsü mapatongji taruba July ita nungi tenzüktsü renema lir,” ta WHO Regional Director for Africa, Dr Matshidiso Moeti-i osang jangjashitsü.

Angola nung mezüng poktetshiba sülen tan June ita 13 nü tashi nung China, Kenya aser DRC nunger densemba linük 3 tashi nung Yellow Fever tashidak adokba osang bushiteta lir.

Ano, tanü tashi nung Yellow Fever nokdangtsü mozü dose million 15 shi Angola aser DRC nati yokba osanga Moeti-i metetdakja liasü.