Angola : Football reprangertem nungtepa asemtepdang nisung 17 asü

Luanda (Angola) February 11 (Agencies) : Uige yimti, Angola nung aliba football stadium ka nung asaya reprangi arurtem nungtepa asemtepba mapang tajemba agi nisung 17 asü aser aika yirur lir.
Iba lendong ya Hokolbar nikongdang Santa Rita de Cassia aser Libolo telok na asaya tenzüker minute tenet buba nung asaya reprangner nisung noklang aikati stadium indang gate tem rongnung ka nungpoka aitdang atalok, ta osangbenertemi ashi.
Iba tesem nung aliba mozüki sangdong ka ajanga ashiba agi, iba lendong nung tajemba agi nisung 76 tashi yiruba rongnungi parnok 17 süogo. Tasürtemji timba ka arishi küm 20 majung tesa lir aser parnok ya football reprangtsü asoshi ozüng alema stadium nungpoka aiertem liasü. Tang tashi nung ano parnok nisung pungu tasü taküm tsüngda lir.
Tenük kuli angurtemi ashiba agi, stadium nungpoka aitertemji aittetka asübo stadium nungji mesemla, kechiba süra iba stadium nung nisung 8,000 tashi ang menteter. Parnoki gate nungpoka aitba mapang nisung kar mezüng alanga tenzük aser nisung ka ma nung kati ajemshia jajaba ajanga nisung asütsüsa aküm.
Iba mesükba lendong ya tanü asüng atalokba rongnung mezüngbuba ka asütsü.
Football sapurtemji gate nung mesemi adenshi aser parnok azüoktsü asoshi police ang kar liasü, ta tenük kuli angurtem rongnung kati ashi.
Angola Tir Jose Eduardo dos Santos-i iba tatalokba kanga junga bushisüngdangtsü tetuyuba agütsüogo, ta Angola nung osangbenertemi ashi.